Der Poeten Maister Gabriel Castner klaget einem wohllöbl. Magistrat,
daß wegen den neuerrichteten Jesuitenschulen die Zahl seiner Schüler abnehme,
und bittet um einen Beitrag zum Hauszins 1561
 

Fürsichtig, Ersam, Weise, gönstig gebüettend herren, F.E.W. Wöllen mein vnderthenig anbringen, gönsticklich vernemen. Als ich vor anderthalb Jahren vngeuarlich, E.F.W. vndertheniklich fürgebracht, wie In mercklichen abgang der schueller, E.F.W. poetenschuell, durch die neue aufgericht Jesuiter schuell, khomen, unnd was mir dadurch für abruch an meinem einnemen ervolgt. Auf wölche beschwärt ich dan zw ergötzlikhait meines schadens, die entlödigung des hauszins begert, jedoch nit erlangt, Sind derselben Zeit die schueller In der anzall sambt meinen Costknaben gewesen 50, vnnd hab die schueller an die Costknaben, auf 40 gerechnet. Wiewoll ich nun wöder dem selben fürbringen, noch hernach, alsvill mir Imer müglich, vnnd ich meiner Pflicht, vnnd aignem gewissen nach, schuldig, In vnnderweisung der Jugend khain vleiß nie gespart, vnnd alsvill eim getrewen Präceptor zuegehörig, an mir gäntzlich nichts erwinden laß, So hat jedoch mein vleiß zw merung der schuell, bisanher so vill nit ersprossen, das ich die In der rechtes Wösen, vnnd wie sy bey mein antecessoren, hette bringen mügen, vnnd mich derhalben weiders nichts zebeklagen het. Nachdem aber iedoch sich die schuell vmd etlich knaben gemert, gleichwoll vmb souill nit, das mir mein einkhomen vill gebössert, oder aufs wenigest, die beschwärt des Huaszins abgenomen wer, so begübt sich In diser anzall der schueller, so ich hab, der Ingenien vnnd alters halb, wie nit on khan sein, ein solche vngleichhait, das ich der lectionen, vnnd des besonder waren instruierens vnnd lernens, souill haben vnnd anrichten mueß, das mir dasselb hinfür mit ainem Collaborator allain zeverrichten, nit allain gantz schwärlich, sonder auch, wen ich ie die Jugent nit negligieren, oder wider mein gewissen nit versaumen soll, vnmüglich.Dan ob ich mich gleichwoll nun ein Zeit lang daran gericht, vnd vmb souill desto mer arbait yber mich genomen, ob ich noch ains mitthelfers entrathen, vnnd der schuell mit ainem allain, on versaumnus der Jugent, vorsteen möchte, In mainung E.F.W. vmb hülf derwögen nit anzelauffen, so hab ich iedoch erfaren und erfars noch, das solches aller sachen gantzvngelegen, vnnd, nur allain ich wolt mich In kürtz ligerhafft, oder zw eim kripl arbaitten, wie in die lang zetreiben nit müglich. Dan nach dem ich In diser vngleichait der knaben vier Classes vnnd ordnungen, unnd nit weniger, sonder ee mer, haben mueß, deren ich eben nit mer haben dörft, wen der knaben hundert vnnd noch mer waren, mueß ich den ganzen vor vnnd nach mittag In der schuell, mit lesen, repetiren vnd von einer classe zw der andern, so emsig In der arbait steen, das ich In sölcher weill khain halb viertl stundt zeruen, Wöliches ein so grosse müe, das ichs villeicht ein Zeit lang also verrichten, aber In die leng nit erzeugen, sonder darob erligen wurdt. Dan ich auch, wen schon ander knaben auß der schuell haimgelassen seindt, dennocht nimer zefeiren hab, sonder mueß auch mit meinen kostknaben besondere arbait haben, vnnd mit Inen gespannen steen, vnnd zw dem, ybersehen vnnd mich beraitten, was ich von ainer schuell zeit zw der andern den knaben lesen wöll.

Wiewoll mir nun vill lieber wer, das einkhomen, so ich bey meinem aufzeheben, erströckhre sich dahin, das ich mich des hauszins nit zebeschweren, vnnd noch ein Colaborator selbs vnderhalden möcht, vnnd e.f.w. derhalben nit belästigen, oder vmb hülf anrüeffen dörft, Jedoch nach dem diese mengl vnnd beschwärten dermassen geschaffen, das sy allain von eim Ersamen rath erstat, vnnd abgelegt mügen werden, so hab ich nit vnnderlassen khünden, e.f.w. solches vnnderthenig fürzetragen, vnnd vmb mülte hülf anzerüeffen. Dan das ich von meinem einkhomen noch ain Collaborator nit vnnderhalden mög, haben e.f.w. leichtlich zeerwögen. Dan so ich des hauszins noch nit enthöbt, ist mein rechnung also gestölt, das ich mich der 80 fl., so mir E.F.W. besoldung geben, nitt vill zerüemen. Dan ich ein Collaborator mitt speise vnnd besoldung vnnder 4o fl. nit außhalden khan, so geen 34 fl. für den haußzins. Wen ich ietzt darzue rechne, was ich noch zue den fünf claffter, für holtz In die schuell khauffen mueß, so lauffen dise ausgaben schon yber die gedachte summa. Das ich mich also allain von der knaben Quattember geldt erhalden mueß. Dasselb aufs aller vleissigest zesamen gerechnet, hat es vergangens Jar ietzt genente Summa kham erraicht.Wen ich nun ietziges Jar schon etwas merers wurde einbringen, ob ich nit dasselb auf mein person, für alle notturft bey disen thewren Zeitten, bedörffe, wen dasselb schon hundert gulden sollt sein, güb e.f.w. ich gönstiklich zwerwögen, vnnd bin vnderthenigs verhoffens, ob ich schon yber hundert gulden 40 oder 50 fl. noch einzenemen sollt haben, oder das ich auf das wenigst des hauszins gefreut were, E.F.W. wurdens mir für khain yberfluß erkhennen. Bevorab, wen ich nit Jarlich, alles was ich erdien, gleich mit mir aufzören, sonder auch etwas wenigs auf mein alter ersparen, vnnd wie ich mit der Zeit weib vnnd khindt, wen mir die gott gundt, vnnderhalden wöll, gedenckhen soll. Dieweil dan mir mein einkhomen, oben gemelter vrsachen halber, so vast entzogen, vnnd geschmöllert, dermassen das mir erstlich den hauszins zebezallen gantz beschwärlich, vnnd am anndern, dasselb zw vnnderhaldung noch aines mitthelfers, nit raicht, So langt an e.F.w. mein vnnderthenig bitten vnnd begern, Die wöllen In ansehung meiner getrewen dienst, vnnd meiner grossen müe vnnd arbait, auch In betrachtung diser theuren Zeitten, vnnd das anderer ort allenthalb die schuelmaister des hauszins gefreut, mich desselben auch gönstiklich enthöben, vnd zue befüederung der Jugent, vnnd vermeidung Irer versaumnus, noch aines mitthelfers halb, gönstige fürsehung thuen. Daentgegen ich mich getreues vleiß, bey meinem dienst ieder Zeit dermassen halten will, das mein vleiß bey der Jugent gentzlich ersprüessen, vnnd was E.F.W. hierin für mülthikhait erzaigen, gantz woll angelegt sein soll. Thue E.F.W. mich vnnderthenig beulchen

E.F.E.W.

vnndertheniger

M. Gabriel Castner

poet.